ملتان: جلالپور پیروالا دریائے چناب میں آئے سیلاب سے ریسکیو کرتے ہوئے کشتی ڈوب گئی، جس میں ایک خاتون اور 4 بچوں سمیت 5 افراد ڈوب کر جاں بحق ہوگئے، جبکہ باقی افراد کی تلاش جاری ہے۔
تفصیلات کے مطابق ریسکیو 1122 کی کشتی سیلاب زدگان کو ریسکیو کرتے ہوئے ڈوبی، کشتی میں 20 سے زائد افراد سوار تھے، جن میں بچے اور خواتین شامل ہیں، متاثرین میںسے متعدد افراد کو ریسکیو کی جانب سے نکال لیا گیا جبکہ ڈوبنے والے باقی افراد کی تلاش کیلئے ریسکیو آپریشن جاری ہے۔
تحصیل جلالپور کے نواحی علاقہ وچھہ سندیلہ میں افسوسناک واقعہ پیش آیا، جاں بحق افراد میں 80 سالہ بخت بی بی، 6 سالہ فاطمہ بی بی، 7 سالہ عامر، 3 سالہ ماہ نور کے علاوہ 6 ماہ اور 3 ماہ کے نومولود دو بچے بھی شامل ہیں۔
وزیراعلی مریم نواز کاالمناک حادثے میں قیمتی انسانی جانوں کےضیاع پراظہارافسوس کیا ہے، وزیراعلیٰ مریم نواز نے جاں بحق افراد کے لواحقین سے اظہار ہمدردی و تعزیت کیا ۔
کشتی الٹنے کے واقعہ پر ڈی جی پی ڈی ایم اے عرفان علی کاٹھیا نے ڈی سی ملتان سے ٹیلی فونک رابطہ کیا، اس دوران بریفنگ میں بتایا گیا کہ پانی کے تیز بہاؤ کے باعث کشتی عدم توازن کا شکار ہوئی۔
ڈی جی پی ڈی ایم اے نے زخمیوں کوبہترین طبی امداد فراہم کرنے کی ہدایت کر دی ہے ، سیلابی صورتحال میں متاثرین کے انخلا کو محفوظ بنایا جائے گا۔ انہوں نے کہا کہ پرائیویٹ بوٹس یا ریسکیو بوٹس میں ہرگزاوورلوڈنگ نہیں کی جائے۔
سٹی پولیس آفیسر کا کہنا ہے کہ ابتدائی اطلاعات کے مطابق کشتی میں 30 افراد سوار تھے جن میں سے 4 افراد کی لاشیں نکال لی گئیں۔
سی پی او نے بتایاکہ جاں بحق افراد میں ایک خاتون اور تین بچے شامل ہیں جبکہ کشتی حادثے میں لاپتا دو ماہ کے بچے کی تلاش جاری ہے۔سی پی او کے مطابق کشتی میں سوار دیگر تمام افراد کو بچالیاگیا، کشتی سیلاب متاثرین کو ریسکیوکرنےگئی تھی اور لوگ زیادہ تعداد میں کشتی پر سوار ہو گئے تھے۔سی پی او کا کہنا ہے کہ زیادہ افراد سوار ہونے کے باعث کشتی الٹی، متاثرہ علاقے میں پانی کا بہاؤ بہت زیادہ ہے۔
