ویب نیوز:ڈیجیٹل کرنسی ’’بٹ کوئن‘‘ کی قیمت تاریخ کی بلند ترین سطح ایک لاکھ 25 ہزار ڈالر سے تجاوز کر گئی۔
خبرایجنسی کے مطابق اتوار کی صبح کرپٹو کرنسی ایکسچینج پر بٹ کوئن کی قیمت اپنی تاریخ کی بلند ترین سطح پر ریکارڈ کی گئی اور بٹ کوئن ایک لاکھ 25 ہزار 245 ڈالر میں ٹریڈ ہوا.
اس سے پہلے رواں سال 14جولائی کو بٹ کوئن کی قیمت نے اپنی نئی بلند ترین سطح حاصل کی تھی جب ایک بٹ کوئن ایک لاکھ 22 ہزار 445 ڈالر میں ٹریڈ ہوا۔
خیال رہے کہ بٹ کوئن ایک ڈی سنٹرلائزڈ کرپٹو کرنسی نظام ہے، جو بلاک چین ٹیکنالوجی پر مبنی ہے اور اسے نظام میں شامل کوئی بھی صارف مائن کر سکتا ہے.
حالیہ برسوں میں بٹ کوئن کی مقبولیت میں زبردست اضافہ ہوا ہے، تاہم مارکیٹ میں بٹ کوئن کی تعداد محدود ہے اور زیادہ تر بٹ کوئنز پہلے ہی "مائن” کئے جا چکے ہیں۔بٹ کوئن کو 2009ء میں متعارف کروایا گیا اور اس وقت اس کی قیمت 0.09 ڈالر تھی۔
رپورٹ کے مطابق سال 2011ء میں اس کی قیمت 26.90 ڈالر تک پہنچ گئی اور 2014ء کے آغاز میں اس کی قیمت 1238 ڈالر ریکارڈ کی گئی، جس کے بعد اس کی قیمت میں تیزی سے کمی آئی اور 2014 کے اختتام تک یہ 315.21 ڈالر تک گر گئی، 18-2017 ءکے دوران اس کی قیمت میں تیزی سے اضافہ ہوا اور دسمبر 2018ء میں یہ 20 ہزار ڈالر تک پہنچ گئی۔
دسمبر 2019ء میں اس کی قیمت ایک بار پھر گراوٹ کا شکار ہوئی اور 6635 ڈالر تک گر گئی، تاہم دسمبر 2021ء میں بٹ کوئن پہلی بار 49 ہزار کی حد سے تجاوز کر گیا، دسمبر 2022ء میں اس کی قیمت کم ہو کر 18 ہزار اور نومبر 2024ء میں 77 ہزار ڈالر تک پہنچی۔
