پاکستان سنٹرل کاٹن کمیٹی (PCCC) کی جانب سے کپاس کی بحالی کے لئے پہلی قومی کانفرنس کے انعقاد کا اعلان کر دیا گیا ہے، جو 4 فروری 2025ء کو ملتان میں منعقد ہوگی۔ نیشنل کانفرنس برائے بحالی کپاس کے فروغ کے لئے قومی اتفاق رائے کی جانب اہم پیش رفت ہے۔ یہ کانفرنس پاکستان سنٹرل کاٹن کمیٹی کی جانب سے کاٹن کنیکٹ کے تعاون سے منعقد کی جا رہی ہے۔ مزید برآں، اس کانفرنس کو تارا گروپ، فاطمہ فرٹیلائزر، اور دیگر نجی شعبوں کی معاونت حاصل ہے۔ نجی شعبے کی بھرپور حمایت اس بات کا ثبوت ہے کہ کپاس کی صنعت کی بحالی کے لیے تمام سٹیک ہولڈرز سنجیدہ اور پُرعزم ہیں.
اس اہم کانفرنس کا مقصد کپاس کی پیداوار اور ویلیو چین کے مسائل کا جامع حل تلاش کرنا اور تمام سٹیک ہولڈرز کو ایک پلیٹ فارم پر اکٹھا کرنا ہے تاکہ کپاس کی بحالی کے لئے پائیدار حکمت عملی وضع کی جا سکے۔اس کانفرنس میں انٹرنیشنل کاٹن ایڈوائزری کمیٹی واشنگٹن ڈی سی کے ایگزیکٹو ڈائریکٹر ڈاکٹر ایرک اور ڈائریکٹر ٹیکسٹائل ICAC کنور عثمان خصوصی شرکت کریں گے۔ یہ کانفرنس حکومت، تحقیقی اداروں، ٹیکسٹائل انڈسٹری، جننگ سیکٹر، سیڈ ، فرٹیلائزر اور پیسٹی سائیڈ کمپنیوں اور دیگر اداروں کے ساتھ ساتھ مقامی اور عالمی ماہرین کے مابین ایک تعمیری مکالمے کو فروغ دے گی۔
پاکستان سنٹرل کاٹن کمیٹی کے نائب صدر ڈاکٹر یوسف ظفر نے اس کانفرنس کو وقت کی اہم ضرورت قرار دیتے ہوئے کہا کہ کپاس کی بحالی کے لئے تحقیق و ترقی کو اولین ترجیح دینا ہوگی۔ ان کا کہنا تھا کہ کسانوں کو جدید ٹیکنالوجی اور وسائل کی فراہمی ناگزیر ہے تاکہ نہ صرف پیداوار میں اضافہ ہو بلکہ کسان خوشحال ہو اور معیشت مضبوط ہو۔ کانفرنس کے انتظامات کے لئے مختلف کمیٹیاں تشکیل دی جا چکی ہیں، جنہیں مخصوص ذمہ داریاں سونپی گئی ہیں۔ کانفرنس میں پیش کی جانے والی سفارشات قومی سطح پر کپاس کی بحالی کے لئے ایک روڈ میپ فراہم کریں گی، جو پائیدار ترقی کی بنیاد ڈالے گا۔
یہ کانفرنس نہ صرف کاٹن انڈسٹری بلکہ پاکستان کی معیشت کے لئے بھی ایک نیا باب ثابت ہو گی۔ پاکستان سنٹرل کاٹن کمیٹی اس اہم اقدام کے ذریعے کپاس کے شعبے میں ایک نئے عہد کی شروعات کی امید رکھتی ہے۔
