ویب نیوز: البانیہ کی عدالت میں مسلح شخص نے دوران سماعت فائرنگ کر کے جج کو قتل کر دیا۔
غیر ملکی خبر ایجنسی کے مطابق البانیہ کے دارالحکومت ترانا کی عدالت میں ایک کیس کی سماعت جاری تھی کہ اسی دوران ایک شخص نے جج پر فائرنگ کر دی۔
حکام کے مطابق جائیداد تنازعہ سے متعلق کیس کی سماعت کرنے والے جج ایسترت کلاجا ہسپتال منتقلی کے دوران انتقال کر گئے جبکہ فائرنگ سے دو افراد،باپ اور بیٹا زخمی ہوگئے، تاہم دونوں کی حالت خطرے سے باہر بیان کی جا رہی ہے۔
البانین پولیس نے فائرنگ کرنے والے 30 سال نوجوان کو حراست میں لیکر تفتیش کا آغاز کر دیا ہے اور ملزم کو عدالت کے اندر پستول کے ساتھ آنے کی اجازت دینے والے اس کے سکیورٹی گارڈ انکل کو بھی حراست میں لے لیا گیا ہے۔
پولیس کے مطابق جیسے ہی مقتول جج نے کیس کا فیصلہ سنایا تو ملزم نے فوری طور پر پستول نکالتے ہوئے جج پر متعدد گولیاں چلا دیں، اس کے بعد ملزم نے کیس کے درخواست گزار باپ بیٹے پر بھی گولیاں برسا دیں. جس سے دونوں زخمی ہو گئے، دونوں زخمیوں کو ہسپتال منتقل کر دیا گیا ہے جہاں انہیں علاج معالجے کی سہولیات فراہم کی جا رہی ہیں۔
پولیس کے مطابق ملزم اور اس کے ساتھی سے تفتیش مکمل کرنے کے بعد عدالت پیش کیا جائے گا، جبکہ مقتول جج کی لاش ضروری قانونی کارروائی کے بعد ورثا کے حوالے کی جائے گی.
