اسلام آباد: پاکستان بار کونسل کی رولز کمیٹی نے انسداد دہشتگردی ایکٹ میں حالیہ ترامیم مسترد کردیں۔پاکستان بار کونسل کی رولز کمیٹی اجلاس کے جاری اعلامیے کے مطابق اجلاس میں متعدد قراردادیں منظور کی گئی ہیں۔
رولز کمیٹی کا کہنا ہے تین ماہ تک مشتبہ افراد کو حراست میں رکھنے کا اختیار آئینی حقوق کے منافی ہے جبکہ لیگل پریکٹیشنرز اینڈ بار کونسلز ایکٹ میں مجوزہ ترمیم بھی متفقہ طور پر مسترد کر دی گئی۔
اعلامیے میں کہا گیا ہے پنجاب میں وکلاء کیخلاف جھوٹی ایف آئی آرز درج کرنے کی شدید مذمت کی جاتی ہے۔
اعلامیہ میں مطالبہ کیا گیا کہ آئی جی پنجاب غیر قانونی اور بے بنیاد ایف آئی آرز واپس لیں، جھوٹی ایف آئی آرز واپس نہ ہوئیں تو ہر سطح پر مزاحمت کی جائے گی ۔
اجلاس میں ممبرقومی اسمبلی ریاض فتیانہ کی جانب سے بار کونسلز ایکٹ میںترمیم کے بل کی بھی مذمت کی گئی.
اجلاس میں حالیہ بارشوں اور سیلاب سے قیمتی جانوں اور املاک کے نقصان پر گہرے دکھ کا اظہار اور وفاقی و صوبائی حکومتوں سے متاثرین کی مدد کیلئے تمام وسائل بروئے کار لانے کا مطالبہ بھی کیا گیا۔
خیال رہے کہ ایک روز قبل قومی اسمبلی کے بعد سینیٹ سے بھی انسداد دہشت گردی ایکٹ میںترامیم منظور کی گئی ہیں.
ترامیم کی منظوری کے موقع پراپوزیشن کی جانب سے احتجاج کرتے ہوئے بل پہلے متعلقہ کمیٹی کو بھجوانے کا مطالبہ بھی کیا گیاتھا.
اجلاس میںسی سی ڈی کی جانب سے کوئٹہ میںجسٹس (ر) ظہور احمد شاہوانی کے گھر پر چھاپے اور غیر قانونی اقدامات کی بھی مذمت کی گئی.
