ویب نیوز: یوٹیوب میں ایک ایسی بڑی تبدیلی کی جا رہی ہے جو کم عمر صارفین کو کچھ زیادہ پسند نہیں آئے گی۔
یوٹیوب کی جانب سے آرٹیفیشل انٹیلی جنس (اے آئی) ٹیکنالوجی پر مبنی ایک فیچر متعارف کرایا جا رہا ہے جس کے ذریعے صارفین کی عمر کی جانچ پڑتال کی جائے گی۔
یہ فیچر 13 اگست سے متعارف کرایا جا رہا ہے اور اس میں صارفین کی عمر کی تصدیق کے لیے اے آئی ٹیکنالوجی کو استعمال کیا جائے گا۔کمپنی کے مطابق اس نئے سسٹم کا مقصد بہترین اور عمر کے مطابق تجربہ اور تحفظ فراہم کرنا ہے۔
کمپنی نے ایک بلاگ پوسٹ میں بتایا کہ آئندہ چند ہفتوں کے دوران ہم مشین لرننگ ٹیکنالوجی کو امریکا میں محدود صارفین کی عمر کا تخمینہ لگانے کے لیے استعمال کریں گے۔
بلاگ پوسٹ کے مطابق اس طرح کم عمر صارفین کے ساتھ ان کی عمر اور بالغ افراد کے ساتھ ان کی عمر کے مطابق سلوک کیا جائے گا۔کمپنی کا کہنا تھا کہ محدود صارفین پر کی جانے والی آزمائش کے نتائج کو دیکھ کر اس ٹیکنالوجی کو بڑے پیمانے پر متعارف کرایا جائے گا۔
کمپنی کو یقین ہے کہ اس ٹیکنالوجی سے وہ صارف کی درست عمر کا تعین کرسکے گی چاہے اکاؤنٹ پر تاریخ پیدائش کوئی بھی درج ہو، تاکہ عمر کے مطابق یوٹیوب کا تجربہ فراہم کیا جائے۔یہ تبدیلی آنے والے وقت میں دیگر ممالک میں بھی متعارف کرائے جائے گی۔
اے آئی ٹیکنالوجی مختلف چیزوں کے ذریعے صارف کے عمر کا تعین کرے گی، جیسے وہ کس قسم کی ویڈیوز کو سرچ کرتا ہے، دیکھے جانے والی ویڈیو کیٹیگریز یا اکاؤنٹ کی اپنی عمر، یعنی وہ کتنے عرصے سے کام کر رہا ہے۔
اگر اے آئی سسٹم نے تعین کیا کہ صارف ایک کم عمر نوجوان ہے تو اس پر خودکار طور پر عمر سے متعلق پابندیوں کا اطلاق ہوگا۔البتہ اگر سسٹم کی جانب سے صارفین کی عمر کا درست تعین نہیں کیا جائے گا تو وہ حکومتی شناختی کارڈ یا کریڈٹ کارڈ کے ذریعے ثابت کرسکے گا کہ وہ 18 سال سے زائد عمر کا ہے۔
مذکورہ تبدیلی کا سب سے ذیادہ اثر کم عمر بچوں پر ہوگا، جن کے لئے محدود آپشنز کے ساتھ غیر اخلاقی مواد بھی سرچ کرنے پر ممانعت ہو گی.
