لب آزاد
چیف جسٹس لاہور ہائی کورٹ عالیہ نیلم نے سیکرٹری ڈسٹرکٹ بار ملتان سید عارف حسن شاہ کی جانب سے عدالتی نوٹیفیکیشن کے خلاف دائر کردہ رٹ کو پرنسپل سیٹ پر ٹرانسفر کرنے کا حکم دیا ہے جس کی وہ خود 6 جنوری کو بطور اعتراض کیس سماعت کریں گی ۔یہ رٹ درخواست سابق صدر ہائی کورٹ بارایسوسی ایشن ملتان سید ریاض الحسن گیلانی کے توسط سے دائر کی گئی ہے۔
درخواست گزارکے وکیل نے فاضل چیف جسٹس کے جاری کردہ نوٹیفیکیشن نمبر38620 مجریہ 3 دسمبر 2024 ء کو غیر آئینی، غیر قانونی اور انصاف کے اصولوں کےمنافی قرار دیتے ہوئےاستدعا کی کہ عام آدمی کو انصاف سے محروم کرنے اور اسے بیوروکریسی،پولیس اور انتظامیہ کے خلاف آوازاٹھانے سے روکنے کی شعوری کوشش کی گئی ہے۔ انہوں نے پٹیشن میں کہا کہ حکومت شکایت کے ازالے کیلئے متبادل فورم فراہم کرنے میں ناکام رہی ہے۔انہوں نے کہا کہ ملتان کے وکلاء نے اسے مسترد کردیا ہے اور اسے فوری طور پر واپس لینے کا مطالبہ کیا ہے۔انہوں نے کہا کہ نئے نوٹیفیکیشن نے عام سائلین کیلئے مشکلات پیدا کردی ہیں اور انہیں بیوروکریسی کے رحم وکرم پر چھوڑ دیا ہے۔اب وہ پولیس کی غیر قانونی حراست اور نظر بندی کو بھی عدالت عالیہ میں چیلنج نہیں کرسکتےہیں،اس لئے مذکورہ نوٹیفیکیشن واپس لینے کا حکم دیاجائے۔
